विराटनगर :  मोरङको बूढीगङगा–३ मा  बिहीबार बिहान भएको कार दुर्घटनामा परी एक महिलाको मृत्यु भएको छ भने तीनजना घाइते भएका छन्।
बा११च १५७१ नम्बरको कार आफैँ अनियन्त्रित भएर कोशी राजमार्गमा दुर्घटना हुँदा बेलबारी नगरपालिका-१  घर भएकी ३० वर्षीया चन्द्रकला राईको उपचारको क्रममा बूढीगङ्गास्थित विराट शिक्षण अस्पतालमा मृत्यु भएको मोरङ प्रहरीका प्रवक्ता डिएसपी दीपक श्रेष्ठले जानकारी दिए।
डिएसपी श्रेष्ठका अनुसार चन्द्रकला सवार बा११च १५७१ नम्बरको कार आफैँ अनियन्त्रित भएर कोशी राजमार्गअन्तर्गत बूढीगङ्गा–३ मा दुर्घटनामा परेको थियो। बेलबारीबाट विराटनगरतर्फ आउँदै गरेको कार सडकमा रहेको बिजुलीको पोलमा ठोक्किँदा बिहान ११:३० बजेतिर दुर्घटना भएको प्रहरीले जनाएको छ।
दुर्घटनामा कार चालक बेलबारी–१ का ३८ वर्षीय बाबुराम कार्की, बेलबारी–१ की ४३ वर्षीया गीता लिम्बू र ५५ वर्षीया सानी धिमाल घाइते सामान्य भएका छन्। घाइते सबैको विराटनगरमै उपचार भइरहेको डिएसपी श्रेष्ठले जानकारी दिए।
उनका अनुसार मृतक चन्द्रकला र घाइते सानी मुटुसम्बन्धी पुरानै समस्या रहेकी छिमेकी गीता लिम्बूलाई लिएर उपचारका लागि विराटनगरतर्फ आउँदै गरेको खुलेको छ। दुर्घटनामा परेर कार पूर्ण रूपमा क्षतिग्रस्त बनेको र घटनाको अनुसन्धान थालिएको प्रहरीले जनाएको छ।