सिमरा: जंगली हात्तीको आक्रमणमा परी एक महिलाको उपचारका क्रममा मृत्यु भएको छ ।

जितपुरसिमरा २१ अमलेखगञ्जकी ५१ वर्षीया रुगैदा खातुन अमलेखगञ्जमा बिहिवार दिउँसो हात्तीले आक्रमण गर्दा घाइते भएकी थिइन । घाइते खातुनको उद्वार गरि अल्पाइन अस्पताल पुराए पनि  अस्पतालले खातुनलाई  मृत घोषित गरेको थियोे  ।

बाख्रा चराउन जंगल गएको समयमा खातुनलाई हात्तीले आक्रमण गरेको हो । अमलेखगंजस्थित नेपाल आयल निगम अगाडी रहेको पार्किङ नजिकको जंगलमा खातुनलाई हात्तीले आक्रमण गरेको थियो ।

हात्तीले आक्रमण गर्दा खातुनको घाँटी र खुट्टामा चोट लागेको थियो । खातुनको भित्री रक्तस्रावका कारण मृत्यु भएको चिकित्सकले जनाएका छन् । हातीको आक्रमणमा परि घाइते भएपछि खातुनसंगै जंगल गएका अन्यले प्रहरीलाई खबर गरेका थिए । स्थानीयको सूचना पाएपछि पुगेको प्रहरी टोलीले घाईतेलाई अस्पताल लगेको थियो ।