पुष्पराज खतिवडा
२३ असोज ,बारा: जितपुरसिमरा उपमहानगरपालिका वडा नं.१६ को डकाह खेल मैदानमा जारी वडा अध्यक्ष गोल्ड कप २०८० को दोस्रो दिनको खेल मौवा देवी यूवा क्लब बडहर्वाले जितेको छ । बडहर्वाले फ्रेन्स यूवा क्लब बकुलियालाई ट्राईबेकरमा जितेको हो ।

निर्धारित ७० मिनटको खेलमा दुबै टिमबाट एकएक गोल भएपछि खेल ट्रईबेकरमा थकेलिएको थियो । ट्रईबेकरमा बडहर्वाले ४-२ गोल अन्तरमा जितेको हो । जितसँगै मौवादेवी यूवा क्लब बडहर्वा प्रतियोगिताको सेमीफाईनल प्रवेश गरेको छ ।

पहिलो हाफको ३० औं मिनेटमा मौवादेवीका १२ नंबरका खेलाडी अविसान महत्तोले पहिलो गोल गर्दै टिमलाई अग्रता दिएका थिए । तर अग्रतालाई मौवादेवीले जोगाउन सकेन । दोस्रो हाफको १३ औं मिनटमा फ्रेन्स यूवा क्लब बकुलियाका सुशिल चौधरी गोल गरेसँगै खेल बराबरी भएको थियो ।

दुबै टिमका खेलाडीले पटकपटक पाएको अवसरलाई सदुपयोग गर्न सकेनन् । दोस्रो दिनको खेलमा मौवादेवी यूवा क्लबका गोल रक्षक यूनेश चौधरी मेनअफ दि मेच घोषित भए । उनलाई आयोजक मित्र यूवा क्लबका प्रतियोगिता संयोजक मोहन बहादुर आलेले पुरस्कार प्रदान गरे ।

भोली बुधबारको खेल बिरगजं सिटी क्लब विरगजं र ओझेल यूवा क्लब टाँगिया बस्तीका बिचमा दिउँसो ३ बजेबाट सुरुहुने आयोजकले जनाएको छ ।

प्रतियोगितामा पहिलो हुने टिमले ५० र दोस्राले २५ नगद सहित ट्रफि प्राप्त गर्ने छन् । खेल कार्तीक ३ गते सम्म चल्ने छ ।