३१ असार २०७९
बारा:

कलैया उपमहानगरपालिका वडा नं.२४ सखुइमा गएराति युवाहरुको एक समूहको आक्रमणबाट एकजना गम्भीर घाइते भएका छन् । आक्रमणबाट स्थानीय सरोज चौधरी गम्भीर घाइते भएका हुन् । उनको न्युरो अस्पताल बिरगंजमा उपचार भैरहेको प्रहरीले जनाएको छ ।

होटलमा खाजा खाने क्रममा भएको विवादको बदला लिन घर आउँदै गरेका चौधरीलाई  बाटो छेकेर अर्को पक्षले आक्रमण गरेको स्थानीयले बताए ।

“बिहिवार साँझ सोही वडाको श्रीपुरको एक होटलमा खाजा खानेक्रममा स्थानीय युवासँग विवाद भएछ । होटल संचालक लगायतले छुट्याएर दुबै पक्षलाई घर पठाएका रहेछन् । अर्को पक्षले बाटो छेकेर आक्रमण गरेछ” स्थानीय राजेश चौधरीले भने।

सरोज आफ्ना २ साथी सहित घर फर्कँदै गर्दा होटलमा विवाद गर्ने श्रीपुरका युवाहरू आएर सखुइ गाउँ नजिकै आक्रमण गरेछन् ।

सरोजको हत्या गर्ने मनसायले भएको आक्रमणमा परि अन्य २ जना समेत घाइते भएका छन् । उनिहरुको अवस्था सामान्य छ , चौधरीले भने ।

घटना गएराती १०:३० बजे भएको हो । घटना लगत्तै स्थानीयले प्रहरीको सहयोगमा उद्दार गरि घाइतेलाई अस्पताल पठाएका थिए । घाइतेको अवस्था चिन्ताजनक छ ,उनले सुनाए ।

घटनापछी प्रहरीले होटलका संचालक र अर्का एकजनालाई पक्राउ गरि अनुसन्धान भैरहेको जनाएको छ ।

घाइते चौधरी वडा नं.२४ कार्यालय कार्यालयका सहयोगी हुन् ।